AMEA  Gəncə Bölməsində

KONSTİTUSİYA  GÜNÜ  QEYD  EDİLMİŞDİR

      AMEA  Gəncə  Bölməsində   12 Noyabr - Konstitusiya Günü  münasibətilə  “Ziyalı sözünün qüdrəti”  mövzusunda  dəyirmi  masa  keçirilmişdir. AMEA  Gəncə  Bölməsinin təşkilatçılığı və İctimai-siyasi Proseslər Beynəlxalq Araşdırmalar  Mərkəzinin  iştirakı  ilə təşkil  olunan tədbirdə Bölmənin əməkdaşları, ziyalılar  iştirak etmişlər. İlk öncə iştirakçılar ulu öndər Heydər Əliyevin şəhərin Baş meydanındakı abidəsini ziyarət etmişlər.  Tədbir  Dövlət  Himninin səslənməsi və Konstitusiya  gününə  həsr  edilmiş video-çarxın  nümayişi ilə başlamışdır.  Tədbiri AMEA Gəncə Bölməsinin sədri, akademik Fuad Əliyev açaraq  1995-ci il noyabrın 12-də xalqımız tərəfindən referendum yolu ilə qəbul olunmuş Azərbaycan Respublikasının ilk Konstitusiyasının yaradılması münasibətilə xalqımızı və tədbir iştirakçılarını təbrik etmişdir.

İlk Konstitusiyamızın yaranmasında müasir Azərbaycan dövlətinin memarı, müdrik dövlət xadimi Heydər Əliyevin tarixi xidmətlərindən danışılmış, müstəqil ölkəmizdə Konstitusiyamız əsasında qazanılmış nailiyyətlər haqqında ətraflı məlumat verilmişdir. Vurğulanmışdır ki, müstəqil Azərbaycan Respublikasının Konstitusiyası ölkəmizdə demokratik, hüquqi, dünyəvi dövlət quruculuğu prosesi üçün hüquqi baza yaratmışdır.  Xalqımızın ümummilli lideri Heydər Əliyevin siyasi kursunun layiqli davamçısı Azərbaycan Respublikasının Prezidenti cənab İlham Əliyevin  dünyada həyata keçirilən siyasi prosesləri nəzərə almaqla, Konstitusiyamıza ümumxalq səsverməsi-Referendum yolu ilə əlavə və dəyişikliklər edilməsi ölkəmizin inkişafı naminə icra edilmişdir.

İctimai-siyasi Proseslər Beynəlxalq Araşdırmalar Mərkəzinin sədri Samir  Adıgözəlli Konstitusiyamızın qəbulunun müstəqillik tariximizin ən mühüm hadisələrindən biri olmaqla Ulu Öndər Heydər Əliyevin Azərbaycan dövlətçiliyi qarşısındakı böyük xidmətlərindən geniş məruzə etmişdir. AMEA Gəncə  Bölməsinin  Diyarşünaslıq İnstitutunun tarix şöbəsinin müdiri, tarix üzrə elmlər doktoru Həsənbala  Sadıqov müstəqil Azərbaycan Xalq Cümhuriyyətinin yaratmaq iustədiyi ilk Konstitusiyası haqqında tarixi sənədlər əsasında geniş məruzə etmişdir. “Dövlət və Qanun” qəzetinin Baş redaktoru Yasəmən  Əsgərova  Konstitusiyamızın vətəndaşlara bəxş etdiyi hüquqi təminat haqqında çıxış etmişdir.

Sonrakı çıxışlarda ilk müstəqil Konstitusiyamızın maddələri haqqında tədbir iştirakçılarına geniş məlumat verilmişdir.  Çıxışlarda  siyasi, hüquqi və iqtisadi  bölmələri təsbit  edən Konstitusiyanın  elmi və demokratik prinsiplər əsasında yaşamasında ziyalı sözünün qüdrəti xüsusilə vurğulanmışdır.